Home Shqipëri
Rama si Erdogani: Vë gjithë shtetin kundër fjalës së lirë
Kryeministri Rama i ka hapur në kuptimin e plotë të fjalës luftë medias dhe fjalës së lirë në Shqipëri duke njoftuar se do të padisin çdokënd për çdo gjë që maxhoranca do ta cilësojë shpifje.

Në këtë mënyrë, kryeministri dhe qeveria synojnë që t'i mbyllin gojën çdokujt që mendon ndryshe nga ata dhe që beson se gjërat mund të bëhen më mirë në këtë vend, ku tenderët nuk i marrin vetëm të besuarit e Ramës, ndërsa PPP-të oligarkët pranë tij.

Po ashtu, Rama do të padisë çdokënd që denoncon një rast korrupsioni në administratën e tij tërësisht politike, si edhe çdokënd që thotë se droga po bën kërdinë në Shqipëri dhe se maxhoranca bashkëqeveris me bandat.

Një shembull të tillë, ku çdokush mund të padisë gazetarët në gjykatë nëse mendon se njerëzit e medias po shpifin ndaj tyre po e aplikon Erdogani në Turqi.

Më poshtë, postimi i Ramës
Asnjë ministër dhe asnjë deputet i Partisë Socialiste nuk do të tolerojë më asnjë shpifje.

Çdo shpifje të hedhur në drejtimin tonë nga kazani politik e mediatik, a qoftë edhe nga kazani i profileve zyrtare digjitale, ne do ta padisim në gjykatë.

Boll me përgënjeshtrime, boll me kundërpërgjigje, boll me debate televizive të sajuara për t'u bërë jehonë shpifjeve apo për të fituar audiencë e me zhurmën e fabrikës së baltës. Boll me këtë neveri që po helmon Shqipërinë dhe po rrënon çdo gur të themelit të edukatës e mirësjelljes qytetare, të cilin çdo familje e ndërton përditë me aq mund e durim për fëmijët e vet. Çdo shpifje në gjyq!

Çdo lek i fituar nga një gjyq për shpifje, do të shkojë në Fondin e Edukimit. Ky fond do të krijohet prej nesh për të mbështetur çerdhet, kopshtet, bibliotekat e shkollave, nxënësit e mirë të çdo komuniteti, me libra, kompjutera apo materiale mësimore.

Fondi i Edukimit, do të garantojë që paratë e ardhura nga gjyqet që do të bëjnë kryeministri, ministrat, deputetët, kryebashkiakët socialistë apo të tjerë veprimtarë të forcës sonë politike të gjendur përballë një shpifjeje, të shkojnë në destinacion, mbështetur në propozimin e fituesit të gjyqit.

Fondi i Edukimit do të ketë një bord drejtues, të zgjedhur me propozimin dhe miratimin e mbledhjes së zgjeruar të grupit parlamentar e qeverisë. Ky bord do të trajtojë propozimet e lartpërmendura dhe është e vetmja instancë që mund të vendosë tërheqjen nga një proces gjyqësor për shpifje.

Në Partinë Socialiste do të ngrihet menjëherë Departamenti Antishpifje. I cili do të koordinojë dhe ndjekë ecurinë e betejës sonë frontale ligjore kundër Shpifjes.

Kazanpolitika dhe kazanmedia, s'mund ta kthejnë Shqiperinë në kazan. Shpifësit duhet të paguajnë dhe ne nuk do t'i kalojmë më në heshtje apo me reagime politike, fëlliqësitë e tyre. Çdo shpifje ndaj nesh, do ta kthejmë në të ardhura për Fondin e Edukimit.

Ngarkohet një grup pune, për përgatitjen e dokumentave të themelimit dhe funksionimit të Departamentit Antishpifje dhe Fondit të Edukimit. Këto struktura duhet të jenë operacionale, menjëherë pas kalimit në Kuvend të Paketës Antishpifje.

Ky propozim është i hapur për kontributet e çdo pjesëtari të mbledhjes së zgjeruar, por edhe propozimet e çdo miku të këtij rrjeti social janë të mirëpritura.

Shënim për ju: Këshilli i Ministrave do të diskutojë së shpejti projekt-vendimin për reagimin e detyruar ligjor ndaj shpifjes, të çdo institucioni apo enti publik në Republikën e Shqipërisë.
Dërgoja mikut në:
Shkruani komentin tuaj!
 
Nën mëshirën e plumbave, stërvitja e vështirë e gardistëve shqiptarë (VIDEO)
Përmendi djalin dhe desh qau në studio, Rama sqaron deklaratën e bujshme
Skandali, cilat media shqiptare janë paguar nga Greqia
VOA plas bombën, garë e manipuluar në koncesionin e karburanteve
Njihuni me Dianën, shqiptaren që lindi femër por jetoi tërë jetën si burrë (VIDEO)

Shqipëri Kosovë Maqedoni Sport Showbiz Argëtim Lifestyle Teknologji Auto Ekonomi Bota Video Lajme Foto Lajme English News
© 2003 - 2018 Albeu Online Media